Di karang Isa Lee
Ukai enda pechaya tang iran mimit laban enda nyangka
penanyi ke dulu suba kala dikumbai “the most popular Iban
singer” diatu agi berupai sigat, mengkang ngetanka
gaya iya jeman taun 70-an suba. Christopher Kelly, 65 ke popular enggau lagu
Agi Idup Agi Ngelaban datai ari Kampung
Siling Lundu tang diatu udah pinchin gawa ba JKR Kuching. Iya meruan gerai
sereta lantang begulai enggau sida sebilik ba Lorong 10, Tabuan Dayak di
Kuching.
 |
| Christopher Kelly begambar begulai enggau Chairman PPSKD Mervyn Tajem |
Christopher Kelly terubah enggau orang ba pengawa belagu dalam
taun 1969 lalu iya entara renggat penanyi ke dulu mungkal industri muzik Iban.
Kaul iya ke manah enggau RTM terus ngangkatka nama iya nyerumba populariti lagu
Agi Idup Agi Ngelaban, Beserara Meh Tua Indai Dom, Bungai Layu, Tinchin Semaya
enggau mayuh lagu hitz iya ke bukai. Christopher
nadai beniat ngiga pengawa baru kelimpah ari beribun tiga iku uchu ti chukup
dikesayauka iya, Hector Favian, Hamlet
Yoyo enggau Adamrain. Entara album ke udah kala dirikut iya kenyau ari taun
1970 suba iya nya album Beserara Meh Tua Indai Dom, Nuan Meruan Di Ati Aku, Bungai
Layu, Agi Idup Agi Ngelaban, Anak Dara, Mar Mudah Mesti Diuji enggau Beraie
Nganti.
Komposer / Band & Artis
Ke Serambau
Christopher Kelly rindu begulai enggau enda milih orang
nyengkaum komposer, pemuzik enggau penanyi ke serambau enggau iya.
“Band keterubah begulai enggau aku iya nya Orkestra Mekar Dahlia, beketuaika B.
Osman, siku komposer ari Indonesia.
Kelimpah ari nya, bisi mega band bukai baka D’ Bacardi tang suah agi sida nya
semina ngiring aku maya ke merindang atas panggau”, ku
Christopher Kelly ti madahka pengawa iya ke nyadi penanyi popular suba asai ke
diambi mimpi laban peluang nya enda suah sangkai ba pengidup siku-siku kitai.
Ditanya sapa bagi penanyi bukai ke semak pendiau enggau
iya maya ke agi tebilang suba, Christopher Kelly madahka jeman nya suba sigi
bedau mayuh penanyi baka ke diatu. Taja pan pia ku iya, iya suah agi begulai
enggau Pauline Linang, Penny Lily, Nancy Kadir, Mary Awel enggau Catherine Goh.
Ngenang melodi enggau leka lagu, Christopher madahka iya
empu mayuh ngaga leka lagu kediri taja siti dua tiun lagu iya bisi diambi ari
penanyi bukai. Munyi ku kenang aku dulu agi ari tu, penanyi kitai enda ulih
nyeliahka diri ari nunda tiun lagu bansa bukai laban maya nya suba kitai baru
berengkah; ka pan enda nunda enggi orang meh kitai. Taja pan pia, aku arapka
bala pemacha enda salah anggap laban pengawa nunda lagu orang bukai ba jeman tu
sigi ukai utai ti diperansang. Kebuah pia laban komposer kitai diatu udah lebih
bedaya, lebih kreatif, lebih bepeluang nguna media enggau teknologi baru lalu gawa
ba gawang dunya pemerindang ke lebih besai.
Lagu Popular
Lebuh aku ngasuh iya ngerintaika lagu popular iya,
Christopher tusah amat deka nyaut laban lagu nya ukai mimit. “Entara
lagu ke meri reti ba pengidup aku iya nya Agi Idup Agi Ngelaban. Lagu Agi Idup
Agi Ngelaban dikena meransang bujang berani kitai Iban baka Awang ak Rawing
enggau Kanang ak Langkau. Leka jaku Agi Idup Agi Ngelaban mega udah nyadi moto
sedadu darat lalu udah lekat bendar ba ati, runding enggau mulut orang mayuh
kelebih agi dikena kitai ngeringka semengat diri lebuh betapi enggau munsuh”,
Christopher nyambung kenang iya pasal lagu Agi Idup Agi Ngelaban.
Aku agi ingatka siti cherita ti tau dikumbai bala pemacha
bula ke ngenang siku orang bujang ke baru ngujika diri nanggam pengerindu
enggau siku dara. Ketegal apai indai indu nya enda tentu deka nerima iya, dia iya
lalu masang lagu Beserara Meh Tua Indai Dom ngichaka indu enggai apai indai
indu ke betakah dua pintu ari bilik sida ulih ninga serebana ati iya. Nyau
pemuas-muas tudah tuai ke masang lagu nya, dia apai indai indu tu tadi lalu
berubah sinu lalu nerima akih tu nyadika menantu. Baka nya meh siti cherita ke
bisi besangkut-paut enggau lagu Beserara Meh Tua Indai Dom ti disadaka
Christopher Kelly ke bisi kuasa nyerakupka dua ati nyadi siti.
“Agi bisi lagu popular aku ke bukai nyengkaum Anang Gila Main
Judi, Tinchin Semaya, Nora, Di Tebing Tasik enggau mayuh ke bukai”,
ku Christopher Kelly mulaika pengingat diri senentang lagu popular iya suba.
Kenang Pait Manis
“Kelalu mayuh utai ti ngasuh ati rindu maya ke agi aktif belagu
suba. Tambah mega maya nya diri empu agi rumpas lalu nadai tentu tetanggul maya
ke bejalai. Siti pengingat ti enda mudah lenyau iya nya lebuh aku ngarika
penanyi kitai Iban ari Sarawak belagu di Angkasapuri Kuala Lumpur. Maya nya kami
diasuh orang belagu ngena orkestra ti betuaika Johari Salleh. Taja jarang belagu
ngena orkestra, aku benasit amat laban nadai penanggul maya ke berengkah belagu.
Aku mega agi ingat amat lebuh S.M. Salim ke nyadi juruacara maya nya, bisi
nyebut sereta madahka aku meh penanyi Iban ti keterubah diambi belagu ba
Angkasapuri Kuala Lumpur”, Christopher bekunsika
cherita ke nyadi dalam taun 1973 suba.
Kelimpah ari kenang nya, Christopher mega sempat
bekunsika cherita dua iku indu dara ke sanggup mayar tambang bilun iya pulai
ari Miri ke Kuching ketegal agi belala begulai enggau iya. Indu dua iku nya ku
iya sedang pemajik lalu madahka diri datai ari Taman Tunku Miri. Laban enggai
nyadi enda mulaika diri sama-sama enggau bala pangan iya ke bukai, Christopher
Kelly enda ulih nurutka peminta indu dua iku nya. Kenang nya ku iya meruan
diisimpan iya belama, siti pengingat ke enda ulih dibeli entara penanyi enggau
peminat.
Ditanya senentang kenang pait, Christopher Kelly madahka diri
kala dituntung pekara ti ngasuh iya tusah. “Kadang-kadang
orang ti ngangauka kami belagu enda mayar kami nitihka semaya. Aku mega suah
dibai RTM belagu ari pun taun 1970 ngagai 1975. Maya nya menua kitai agi siga
laban kominis. Kami dibai perintah belagu ba program ke dikumbai Perang Saraf.
Mayuh menua ditengah nyengkaum Simanggang enggau Sibu. Di Sibu kami lalu dibai orang
ngagai Operation Bebatak Nanga Ngungun, Nanga Tada, Nanga Jagau enggau Nanga
Sekuau. Kelimpah ari nya, kami mega suah
dibai merindang di pasar Sarikei, Binatang (diatu Bintangor), Sibu, Camp
Lanang, Camp Oya Batu 14 enggau tempat-temnpat ke bukai. Siti agi pengingat
pait aku nya lebuh bilun engkabang ti ditepan kami ari Kapit ke Kuching rusak
ba tengan jalai. Kami nikal baru ke Sibu. Agi mayuh kenang ke bukai tang enda ulih
dirintaika aku ditu magang”, ku Christopher baka ke agi
belala mulaika pengingat diri.
Pekit Bintang Lagu Klasik
Iban
Aku sempat nanyaka komen iya pasal lagu lama tauka lagu
klasik Iban. Iya tetap nyukung orang ti deka ngangkatka lagu klasik Iban laban
nya nandaka kitai agi ingat sereta mengkang rinduka lagu lama.
“Aku besetuju amat enti kitai ulih ngadaka pekit lagu klasik
Iban. Ukai mina sida ke biak, kitai ke tuai mega tau mulaika pengingat diri ngagai
penanyi lama enggau lagu klasik nya. Sekeda ari lagu nya udah nyadi ever-green
diatu”, ku iya.
Puji Tuhan
Kelalu mayuh jaku
randau aku enggau Christopher Kelly tang enda ulih bantaika ditu magang. “Utai
ke ngasuh aku berasai temegah nya aku udah mujur nyengulaka dua iku anak aku
datai ke “menara gading”. Seduai iya diatu bela udah bisi pengawa kediri. Anak
aku ke tuai, Dominic gawa ba Brooke Dock
Yard lalu Regina gawa ba Lembaga Lada Hitam di Kuching. Puji Tuhan laban ngena
gaji aku ke mesa nya suba enggau sesen dua duit ke ulih aku belagu, aku ulih
nyengulaka sida”, Christopher Kelly majak mantaika
cherita enggau ati ti sinu, sebuti ke enda labuh ai mata.
Pesan
“Aku arapka komposer Iban ulih nengkebang muzik kediri tang
anang kelalu ngemaruhka muzik dangdut. Peda kitai Rhoma Irama, Mokhsin, Mansor
S kaya ketegal lagu dangdut. Reti nya, nadai siti genre muzik ke enda manah
tang tepulai ngagai chara kitai ngelakuka
iya. Kitai ukai enda ulih idup enggau muzik rock tang udah kelalu mayuh orang
ti ngemeranka muzik nya”, ku Christopher Kelly
meransang komposer baru ke patut endar nengkebang tiun enggau leka lagu kediri.
Kitai arapka Christopher Kelly meruan gerai, meruan
lantang, meruan merindang, meruan dikerindu sereta meruan dikeingatka peminat
iya. Manah amat enti iya agi ngembuan pengering enggau pengeliat ati munyi ku
lagu iya empu - Agi idup Agi Ngelaban.
